慶生飯

慶生飯

文章日期：05/31/2012 11:00 pm

咁快又一年啦...好朋友們又一年同心急人慶生，今年去南海一號
為了可以清楚欣賞維港夜境，所以店內燈光比較暗。待應第一時間將home tea 及蝦片放到心急人&闊太面前，等齊人先點菜。
女性慣性飯後甜品...今次點了四個甜點，最無特色而最貴就係呢碟煎堆嘞~
其他食物都好好味，唯獨服務.....太好...好到有點煩~

My Cake

同勞力士一早約定今日返屋企食飯+切蛋糕
噚日媽咪話去和花亭同心急人慶祝生日...haha..因為佢有張$50 coupon~結果細佬請食飯，佢好少請食飯，多謝哂
一家5口食完行一陣商場先返屋企...太飽啦~

等到9點幾切蛋糕，個蛋糕盒、絲帶都好靚，媽咪見到好興奮，急不及待好快手開咗個盒...我都未影個packing~
開咗盒大家不停影相，支candle係金色好靚，大家非常興奮
蛋糕表面好似平平無奇，一切開層次分明，入口甜度適中，生果又好新鮮，個個話正呀，個個都食得好開心!!

呢個蛋糕人氣好勁，名氣大價錢貴，食完真係覺得值呢個價。一年豪一次，多謝親愛嘅勞力士

靚靚第一次

靚靚第一次

文章日期：05/27/2012 11:00 pm

其實一早已打算帶靚靚出街沖涼&修毛，但勞力士一拖再拖...直至勞三嫂事件出現，勞力士極速行動
今日勞力士一早過去接靚靚，10點等美容院開門，第一個唔洗等
心急人&勞力士初時都有擔心靚靚會反抗、會唔開心，點知佢去到美容院出奇地乖(因為驚)...連個店長都讚佢乖~
靚靚平時好鍾意用按摩器按摩，心急人&勞力士認為靚靚一定以為剪毛器是按摩器



差唔多12點完成，全包$350。

心急人&勞力士超肚餓，原本以為可以放低靚靚去食嘢...點知要等到12點先食。跟住帶咗靚靚返sweet home & 媽咪屋企，靚靚從未試過一日內去咁多地方

希該勞三嫂滿意，唔好咁多聲氣~

美素佳兒講座、畢加索

美素佳兒講座、畢加索

文章日期：05/26/2012 11:00 pm

原本在29/4參加美素佳兒講座，因為天氣不穩，所以改到今日在怡東酒店舉行。今次主要講有關孕婦飲食營養、餵哺母乳技巧及BB沖涼程序。講座內容
實用，但禮物欠吸引，只有一本育兒書、一份食譜及一罐孕婦奶粉。孕婦奶粉會轉送他人

跟住心急人同勞力士就去咗沙田睇畢加索─巴黎國立畢加索藝術館珍品展，其實買票時以為文化博物館係尖沙咀...
文化博物館好大，除咗睇畢加索藝術館珍品展，仲有趙少昂書畫展(Daddy啱哂)、有關粵劇展覽及羅文博物館，一個好值得去嘅地方。足足行咗2小時，跟住行去新城市中心食飯

每次去新城市中心都好唔舒服，人太多，多到好似過深圳關口咁；樓底矮，超嘈...

家有關二嫂

家有關二嫂

文章日期：05/26/2012 12:00 pm

一直聽人講教協買BB嘢好平，星期五晚同勞力士第一次上教協， 心急人發現唔係樣樣嘢都平，只有少部份較平，有好多嘢藥房仲平。心急人買了產婦衛生巾(@$25)及乳墊($78)，買完才發現同萬寧一樣價~

之後去咗小儀新開車仔麵到開餐，除咗湯底稍咸，其他都ok，可以再幫襯~

跟住去永安行吓...點知係呢個時間勞力士就收到佢細佬whatsapp...內容大致話佢女朋友鼻敏感嚴重咗，想我哋帶靚靚過嚟sweet home住一頭半個月咁話...
勞力士當然唔想啦, 因為依家成屋都係BB嘢，加上勞力士濕疹嚴重咗，而心急人又幫唔到手拖地~
之前佢都要求過一次，當時情況許可都有帶靚靚過嚟住，靚靚真係唔習慣，貓認屋唔認人...
勞力士拒絕咗佢，點知佢話將靚靚放朋友家住住先...勞力士當然唔會俾佢咁做啦~
呢件事整到心急人好唔安樂、好擔心......之後一定會有嘢發生~

話說佢女朋友入住不久就掉哂原先放客廰嘅飾物，放哂自己嘅Hello Kitty，當時心急人心諗你洗唔洗咁快插旗呀...就好似宣示主權咁~
心急人唔會理佢，間屋又唔係心急人，只覺得佢唔係正經女仔，正常女仔有屋企都唔會咁做啦~
到上年農曆年前，勞力士見佢細佬間房咁細，出於好心offer佢轉去勞力士原本間房啦...話口未完佢細佬話佢女朋友訂咗床，要勞力士農曆年前去清場...激到勞力士&心急人呢~洗唔洗咁快呀...叫你轉房啫，冇叫你換床喎，張床仲有好多嘢要執。農曆年前好多嘢做，自己屋企都未執，仲要同佢哋執埋~好心冇好報!!
今次又頼靚靚掉毛，有邊隻貓係唔掉毛呢...自己又唔理家居衛生又唔幫靚靚梳毛。勞力士每次都有求必應，今次勞力士出聲拒絕仲叫佢自己買部空氣清新機

今次心急人同勞力士都有一個感覺就係有人想霸屋趕貓~
勞力士再whatsapp佢細佬，話呢間屋係勞力士嘅屋企，唔好以為返嚟少或唔係到住就當係自己，唔鍾意唔滿意嘅嘢就去換或掉咗去....如果佢女朋友唔舒服咪返自己屋企住，好番先返嚟囉...
點知佢細佬答:唔通結咗婚有咗小朋友都要人返外家咩?
心急人嘅直覺全中, 有人真的想霸屋趕貓~
九月先結婚，未入門已經做小動作啦...講到咁長遠...有小朋友, 哼~
可能未有小朋友已經離婚呢~

大減價

大減價

文章日期：05/20/2012 11:00 pm

之前去咗2月份嘅BB展，當時懷孕初期真係唔知要為BB準備乜嘢又唔想咁早買嘢，所以去完都係兩手空空。5月份先施、永安、Sogo、Jusco及一田先後開始大減價，BB已經6個月，心急人亦應該開始買嘢，再遲D驚行唔郁啦~

17號首先去咗上環永安，人太多貨太亂真係冇心機揀，唯有等埋勞力士放假先去太古城嗰間慢慢行~

Sogo thankful week 第一日18號同闊太行咗一陣先去食飯，闊太去咗超市先，而我就去咗6樓童裝部。上到6樓第一眼就見到小童公雞波鞋特價$198，得番幾對，唔諗就買咗俾親戚。跟住見到Hallmark買3件有6折，有new born size，唔想買住想同勞力士一齊揀

同闊太會合再行多一陣就去食飯。當日Sogo收12:00，食完飯10點幾再陪總經理行一陣，Sogo入口見到有個人面青口唇白要救護員急救…..成11點超市仲要打蛇餅俾錢呀…真係好似行年宵~

心急人今日好想好想買嘢，但得一對手又唔可以拎重…要等勞先生星期日來掃貨~

噚日(19/5)終於等到星期六可以同勞力士一齊去行街買BB嘢，諗住今日一次過買得幾多得幾多，所以拖喼行街(好似自由行)~

第一站Jusco, 做緊BB展+吉日有95折+95折優惠，真係平好多喎~買咗3個一直好鍾意嘅膠奶樽，跟住去永安再睇吓…永安真係好多人，比Jusco多人。比較過價錢Jusco平D，係永安買咗少少嘢又返去Jusco再買過^^

之前一直想買嘅玻璃奶樽長期缺貨，點知今日勞先生好求其好快手咁選擇咗另一個牌子。早知唔洗做咁多research啦~

BB嘢買得7788…之後唔洗煩啦~

今日12點前已經到達Sogo，人唔算多，行得都好舒服，可能天氣唔穩定啦…今日Hallmark已經冇哂new born size，只買咗3-6 m size。第一日貨最齊，唔怪得第一日咁多人，要開到12點~

食完lunch 出嚟好大雨，去咗Ikea買隔尿墊及BB睡袋。去到Ikea見到好多印傭係到避雨，仲瞓埋係床到~

跟住去咗Haagen Dars tea time避雨, 再去荷花行一圈，就返嫲嫲家^^

BB嘢好得意好靚，呢兩日真係買得好開心~

家務助理

BB出生後，心急人返工時會交BB給媽咪照顧，到夜晚會帶BB返屋企瞓覺。心急人知道媽咪會辛苦，但大家都唔想請外傭 (已經被嫲嫲嗰印傭嚇壞咗)
打算到時一星期請幾日家務助理幫手，可以做吓家務，睇吓BB~

近期勞力士濕疹又嚴重咗，醫生建議佢唔好做家務，對手要休息吓，而心急人又唔方便勞動咁多。所以現在開始透過樂活一站搵家務助理，一來可以幫輕吓現時嘅家務，二來又可以搵定合適嘅家務助理將來幫媽咪。

今日媽咪都有陪心急人一齊睇睇家務助理嘅工作表現。原本約定9:00開始，她竟然遲到，9:20才到~一入屋就衝入厠所...過10分鐘先出嚟~(她好急!!)
心急人想她抺窗先，她又話最後先抺...心急人覺得抺窗最重要，如果放最後做，做唔切點算...所以堅持要她抺窗，其他工作她自己安排...

她透露她一日做十小時家務助理:9am-1pm; 2pm-5pm; 5pm-8pm，自己有10歲&3歲嘅囡由婆婆照顧....她收入都幾好喎~ 新移民真係好挨得!
她好快手咁做咗抺窗+蚊網、廚房洗抽油煙機+抽氣扇+抺油漬、抺成屋塵、掃地+拖地、洗厠所+抺厠所抽氣扇...
她1:05已經由厠所出嚟，準備執袋走，1:10走咗~

心急人最討厭她遲到早退，又要求心急人買支抺窗棒及新掃把 (她認為現有掃把唔好用~)，又話她的僱主會俾key她自己入屋...(暗示心急人唔一定要在家睇住她做嘢)...無可否認她真快手快腳又有自己小朋友，懂得照顧小朋友，但快就唔係咁乾淨架啦~

心急人遲吓要再試多幾個家務助理，希望遇到個好啦~

照結構 (21w+)

照結構 (21w+)

文章日期：05/04/2012 11:00 pm

第二次(15/3)去贊育時預約了今日做結構，今日已經21w6d，即是明天就22w。
等咗好耐，終於到今日嘞。

今朝同勞力士食完早餐就向贊育出發，9:10到達贊育三樓，10分鐘後就可以入房。好開心唔洗等!!

今次遇到的姑娘好細心，慢慢講解BB心肝脾肺腎。姑娘照BB心臟很仔細，心急人還擔心BB有問題，好彩姑娘說一切正常。
跟住有另一位護士長入來，她應該十分有經驗，再睇多次BB。
唯獨心急人胎盤稍低，要遲些33w再照一次。希望胎盤會慢慢提升，心急人想順產呀
今日姑娘再一次確定BB係Girl

10點幾就走得，心急人同勞力士去咗Sogo Rapee買BB床上用品，有送貨服務，好方便
買完嘢、嘆完茶，勞力士就返工啦

第一踢

今朝勞先生隔住肚皮清楚聽到BB心跳聲、聽到BB活動聲音；今晩食飯時終於感覺BB踢我啦, 第一次感覺到!!