2nd 糖尿測試

2nd 糖尿測試

文章日期：06/30/2012 11:00 pm

噚日下午天文台話會打8號風球，心急人仲驚緊冇得做糖尿測試，打電話去問如果打8號風球點算，職員話星期一或二會有專人打電話俾心急人再作安排，咁都安心D~

夜晚11點幾掛8號，好彩零晨3點已經落哂風球，唔洗再約過第一次咁唔想打風~

今日第二次到瑪麗做糖尿測試，9:10到已經派到120籌啦...9:45先飲完糖水，11:45再抽血。

今日媽咪好醒目買定麵包，11:45抽完血就可以即刻醫肚，慢慢行去坐小巴落CWB，等勞力士一齊食上海嘢

小強累事

今朝一落樓check 電話就見到叔叔&妹嘅miss call，心知不妙....叔叔問Daddy手提就收線，心急人就即刻打俾妹，妹話嫲嫲打"小强"整親隻手...

咁啱今日媽咪又行唔到(骨膜炎)，要Daddy趕返嚟陪佢睇醫生...
Daddy唯有叫工人陪嫲嫲睇鐵打...

心急人唔放心，lunch 時間返入去睇嫲嫲，原來佢半夜3點起身去洗手間時見到"小强"，"小强"就打唔到，自己就跌落地撞到膊頭 (仲要係佢用開嘅左手)...痛咗成晚，到朝早先打電話俾叔叔，但叔叔又上緊大陸喎...
同嫲嫲食完飯盒(有工人都要食飯盒，個工人係癈嘅~)，心急人就走咗嘞，嫲嫲成晚冇瞓，需要午睡...

今次又俾嫲嫲嚇死...(佢自己話隻"小强"累佢洗成千蚊睇鐵打呀~)

Sky100

Sky100做promotion - 龍年出世生日月份免費入場，所以心急人免費入場，而咁啱團購又有Sky100入場券買。Daddy 今日放假，媽咪決定今日去，可惜今天是下雨天

Daddy & 媽咪今日一早入沙田睇畢加索，約咗佢哋3:30係TST等。今日真係太大雨，費事行都係坐TAXI去圓方。行一陣Three Sixty，先上去Sky100，仲以為乜都睇唔到，雖然唔清楚但好彩都睇到~

係Sky100都hea咗好耐吓...跟住就返尖沙咀食飯...今日當做父親節架啦~佢哋明天游船河呀!

忙...飲茶

忙...飲茶

文章日期：06/10/2012 11:00 pm

今日勞力士有嘢要同老爺傾，所以心急人可以遲少少出門，12:45先到酒樓。遲咗少少啫...老爺係咁吹，大肚婆係行得慢......心急人去到成身汗...
食咗少少嘢，好快1:30就走，之後指定動作去超市掃貨...又話買少少嘢，點知又係買好多嘢。勞力士同心急人又要陪佢由太子去九龍塘坐車。

又由九龍塘去tst趕下場，因為約咗勞力士堂妹飲茶，佢話有嘢俾BB，心急人一直以為係坐奶器..原來係電消毒奶樽器。約咗2點半，心急人同勞力士3點先到，好彩佢有個囡陪，傾到4點半又要趕返屋企放低d嘢，同媽咪再出發去Popcorn 等Daddy食嘢睇戲。

齣戲無想像咁好睇...有一點悶~

 

2nd Dr Fung (27w) - 遮住哂

今日預約咗Dr. Fung 1:30pm，去到又係好多人...磅重、量血壓、驗尿後，同媽咪&勞力士去食嘢先，費事浪費時間~
剛剛食完就收到姑娘電話，返上診所好快就有得睇嘞~

Dr. Fung 話BB一切正常，重2 lbs 9 oz，只可惜臍帶漂到BB面前遮住BB，而BB又用手遮住自己塊面(好似好曬咁~)...唉...今次就係浪費$$啦~
Dr. Fung話遲D胎盤會慢慢升，叫心急人唔洗擔心 (其實心急人冇擔心...只想快D知要唔要開刀，如開刀要揀日子之麻...)

睇完去咗荷花，荷花做緊特價，人人上去都係VIP價，今日終於買咗張BB床，19/6送貨^^
今日仲買埋一直好猶疑唔想買嘅孕婦沖洗器...朋友話買咗冇用，但聽講座時姑娘又話要用~

跟住去咗Sogo，行完超市勞力士走先，心急人同媽咪繼續行街，媽咪對馬騮仔袋情有獨鍾，唔知點解咁多媽咪鍾意馬騮仔袋.....佢又揀啱一個，就當生日禮物啦~

2nd 西營盤母嬰健康院 (26w+)

同勞力士講今日去大舞台，佢話:去做乜呀~ 心急人答:去結婚呀~
今日約咗媽咪去大舞台飲茶，好耐冇去過啦~ 大住個肚去緬懷一吓!!
坐到兩點幾就慢慢行去健康院，預約時間3:00，2:50到達，今日好多人，大堂坐滿人...
結果等到4:15先有得見姑娘...又係問吓嘢、按吓肚、聽吓心跳就走得~
等埋預約紙，4:40先走得...咁又搞咗兩個鐘~ 真係好無聊，唔去又唔得~

跟住同媽咪去咗銅纙灣行一陣就返屋企啦~
因為勞力士要留假，之後媽咪都會陪心急人去覆疹...世上只有媽媽好

澳門一日遊

上次出門已經係2011年5月...努力製造BB時，朋友叫心急人唔好去旅行，怕太攰；到有咗BB，媽咪、嫲嫲、勞力士又叫心急人唔好飛，怕水土不服又怕心急人食錯嘢...
5月中心急人向勞力士提議去澳門睇水舞間，勞力士好快答應(因為心急人生日^^)
心急人再提議係澳門瞓一晚，但被拒絶~

一早起身係屋企食少少嘢，就向TST出發~
上次嚟已經兩年半前啦~
今日坐9:30船，到埗後坐shuttle bus去威尼斯人，再行去氹仔舊市搵嘢食~
11點多開始肚餓，求其搵咗間茶餐廳醫肚，食牛尾通心粉、辣魚飽、豬扒包 + 龍鳯檸樂

今次見到官也街有間新嘢，初時以為係普通咀香園，入到去好似旅遊中心咁，幾有特色，可以隨處影相，又有紀念品賣。心急人買咗postcard蓋印仔(好似台灣咁~)寄返俾自己(郵費HK$2.5)。睇吓、影吓、寫吓postcard...都玩咗個幾鐘~

兩點鐘去街頭食懷舊粉麵，店好舊，牆身仲寫上"人手不足，自行開汽水" (好似係咁~)，點咗一碗細牛腩米($22)、菜河粉($16)、淨豬皮魚蛋($22)、忌廉1支($8)...澳門食嘢真係貴咗好多。

上次嚟Galaxy 未開，今次一場嚟到心急人就去撞撞運氣，結果都係敗北而回~

影吓相，行一陣又坐shuttle bus去新豪天地，4點鐘換完水舞間門票，勞力士同心急人就坐咗係Pacific Coffee休息



媽咪爹地上年已經睇咗水舞間，心急人話去睇，佢哋都驚心急人坐得前會被表演者嚇親，所以勞力士買咗A區。。(兩張A區門票+來回船票$2096) 入場前大會有專人免費幫A區觀眾影相，散場時可以攞番張相，原來送嘅相係用printer印出來，質素較差。如果要放大8R又質素好嘅相，就要俾$128~...張相雖然真係幾靚，但心急人唔會就範嘅~

水舞間表演飛車期間，有電單車飛唔中落地點，好彩表演員無事，但要暫停一陣再開始。成個表演都幾危險，一定會發生意外，希望佢哋場場都順利完成啦~

睇完坐shuttle bus返新馬路揾嘢食，勞力士話去沙利文食，兩個人叫少少嘢已經好飽~
食物、環境、服務都係一般，香港嘅翠華or澳門茶餐廳仲好味~
食飽行去清平直街買咀香園+鉅記，再食埋碗桑寄生蛋茶，就行去十六浦坐shuttle bus去碼頭。
坐10:00船，返到屋企都唔洗12點。

20120601

20120601

文章日期：06/01/2012 11:00 pm

心急人咁懶一定會休假慶生!!

今朝一早起身整三文治俾勞力士，未夠九點就同媽咪去美心小品嘆早餐。媽咪平時同朋友會去飲茶，冇人同佢食西式早餐，所以早兩日佢已經諗定要嚟呢度~


食完早餐同媽咪行一陣，跟住返屋企休息吓~等到兩點幾出門去TST Isquare飲下午茶，諗住可以望吓海景慢慢坐。去到3點，得番4、5枱客，待應開始搬枱間房預備晚飯booking.。用屏封遮住個海景，冇海景睇不特止，仲有兩個待應不停頂撞，其中一個仲要係部長，製造大量嘈音~
雖然幾好味，但服務態度十分非常差...心急人唔會再幫襯~

媽咪陪心急人行Harbour City等勞力士放工，媽咪竟然有收獲^^

今晚勞力士book咗東來順，特別點咗TVB 大廚出馬冠軍菜式 - 菌皇龍蝦球...哈哈..電視效應~
其實呢度唔係咁適合兩個人嚟食，冇二人套餐，而餸菜都幾大碟...
兩個人點咗酸辣湯(1位)、雞絲煨麵(1位)、茶葉燻蛋、蔥油海蜇頭、菌皇龍蝦球(1位)、松露霸皇雞、流沙金球...已經好飽啦~
下次嚟一定要食蟹!

咁就過咗一日啦~個個都話出年有多一個人同心急人慶祝...心急人都好期待，出年今日佢都有9個月啦^^