心急人※私生活: 2013

2013年11月18日星期一

勞小姐覆診

經過心急人同媽咪努力用圖書和玩具催眠勞小姐，上星期五帶住玩具覆診已經乖好多。今日覆診仲乖，俾醫生睇喉嚨、聽心口無扭計，臨走同醫生bye bye。

勞小姐還有兩聲咳有痰，今日睇第3次醫生，醫生話勞小姐肺清冇乜事食埋今次藥無需覆診，仲話小朋友唔好食咁多藥。心急人當然唔想勞小姐食藥，之後就靠猴棗末啦~

2013年11月17日星期日

台式蔥花麵包

星期六試整4個蔥花包，用麵包機做麵團1小時-＞排氣-＞做形-＞發酵40mins, 好容易完成~

星期日親戚來媽咪家打麻雀，做咗8個當下午茶。

心急人焗爐好細得12.5L, 估唔到一次可以焗哂8個^^

食譜from Carol 自在生活：
http://caroleasylife.blogspot.com/2008/01/blog-post_16.html

2013年11月13日星期三

香蕉蛋糕

真係好耐冇焗蛋糕，差唔多兩年啦~舊打蛋器都生銹，要買個新。。。

今日手腳慢咗好多。

今晚出爐香蕉蛋糕！

2013年11月12日星期二

機械人

早在2月BB展已經買膠地墊放自己屋企俾勞小姐多D機會爬，6月買多張放媽咪屋企。平日媽咪覺得麻煩好少開地墊，夜晚返到自己屋企都差唔多食奶瞓覺。可能少練習勞小咀差不多9個月先識爬，心急人都有心理準備佢會比較遲先識行。

勞小姐14個月仍未放膽自己行，一定扶住物／人才行，如冇就寧願爬，坐低都好慢好小心唔會整親自己。屋企比較大塵，勞小姐每次落地都要先拖地，有時大家都懶唔想做，就放勞小姐在梳化或大床。。。但現在真的不可以偷懶，因勞小姐落地行嘅欲望越來越強，唯有諗解決方法。。。

上網 search 吸塵機械人，發現呢部係韓國製造，仲可以抹地，yahoo blog有用家讚好（代理商搵好多打手打blog,好難先搵到真正用家~）。上星期五去東港城訂貨，今日收貨。

2013年11月11日星期一

勞小姐病了！

星期六晚發現勞小姐流鼻水，睡前俾佢食返上次剩下嘅藥水，希望可以唔駛見醫生啦！

星期日仲開始有兩聲咳，唔睇唔得嘞~

媽咪同勞小姐睇完醫生就打電話俾心急人投訴，話勞小姐一見醫生就喊，好似醫生打佢咁，醫生用聽筒都聽唔到氣管，惡到死呀。。。>~<

過一陣媽咪又打嚟。。。勞小姐好似你細個咁呀，一食藥水就嘔啦~

唉。。。怕食藥水都會遺傳~

回想細個時，個個都話藥水係甜嘅，而自己接受唔到藥水味道，嘔就會被鬧都幾慘架~

每個人對唔同嘢嘅接受程度都唔同。。。心急人明白勞小姐跟自己一樣接受唔到藥水味道，但藥水又唔可以唔食喎，唯有用方法令佢情緒穩定D。

今日放工立即去三聯買圖書，再去搵玩具。

之前朋友送咗本好多飛機嘅書，心急人借本書同佢講坐飛機故事。宜家問佢飛機點飛架？佢識講"woo"並手指指向上。今日第一次同勞小姐拎住圖書講故事，佢又好有心機聽喎~加埋套醫生玩具,俾佢扮醫生檢查大口仔，心急人檢查下佢咁。。。希望下次見醫生會合作D啦！

2013年11月10日星期日

自製泡菜

勞力士鍾意食泡菜，但外面泡菜好咸，所以跟表嫂學做。

原來最麻煩係將棵菜出水，搞咗大半日。。。三日後可以整泡菜炒飯~

今日完成土匪雞亦，有譚仔味道 ^^

2013年11月9日星期六

心急人想整土匪雞亦，但勞力士未食過，所以今日帶佢食正貨, 順便去北角買香料整A貨 ^^

經表嫂介紹去咗一間老子號買香料，種類好齊，諗到乜嘅香料都有。香料店對面有間校服公司，勞力士話細個老爺帶佢地三兄弟係度買校服。勞力士係北角、鰂魚涌長大，佢話去北角好似心急人返香港仔咁...充滿童年回憶~

買完香料去咗大同買老婆餅，再行一陣先返屋企。

難得有半日可以拍拖行街~
難得北角仲有好多小店舖，小食店，唔係全部連鎖店~
(最近睇新聞透視見到西營盤舊店舖因為加租執哂, 好可惜....現在的香港已經唔係心急人細果時嘅香港啦...)

今晚用13種醃料醃雞亦 ^^

2013年11月8日星期五

Happy Friday!

如果媽咪無約人出街，又唔想出街食太肥膩，有時會一星期煮足七日，煮飯真係好攰架！

上星期心急人叫媽咪今日唔好煮休息一日，順便可以去東港城同勞小姐影下相^.^

勞小姐大咗，出街食飯又麻煩咗~如果張枱大D可以坐BB櫈就好D，但今日要坐BB車，坐一陣要人抱抱。其實心急人明白勞小姐想參與，但有時環境問題好難做到。。。

小朋友真難捕捉~

2013年11月6日星期三

公共圖書館

上網見到好多人分享麵包書，有些麵包書已經售罄，而自己已經買咗4本，唔想再買因為要俾地方放，上網見有谷友係圖書館借書，原來心急人已經唔記得＂圖書館＂。。。無十年都有八年無入圖書館借書，今日到圖書館登記智能身份證。以後可以上網預約、續借，真方便！

亦當為勞小姐養成閱讀習慣作準備XD

2013年11月3日星期日

沉迷P仔

自從P仔到埗後，心急人就開始上網尋找麵包機食譜。咁啱呢期各大書局大減價，結果間斷地買咗4本書。

759阿信屋連續幾日有7折，心急人又大量入麵粉。

仲好有心機研究湯種、老麵，開始掌握到少少嘞！

咖啡吐司

黑芝麻吐司

希望遲D有時間做個裝包啦！

2013年10月22日星期二

麵包香

上星期五落單，星期一送貨，效率好高！

跟機送3盒預伴粉

昨晚即刻用預伴粉試機，臨瞓前將材料放好，預定今早7點出爐。一早出廳就嗅到陣陣麵包香，夠鐘就要快快拎出嚟，怕佢慢慢塌下來XD

第一機好滿意啊！

切開好柔軟

麵包機一磅切得6片, 好難切8片~

媽咪: 我地咪冇得受惠囉

心急人: 你朝早上嚟拎俾daddy囉

媽咪: 遲D妹妹返學都要食麵包早餐, 你地一人兩片, 我地咪冇囉

心急人: 咁咪整兩機包囉

心急人買咁多樣嘢，媽咪最欣賞麵包機！

未有勞小姐之前已經好想買，又驚自己3分鐘熱度，又怕麻煩，試過問朋友借麵包機玩，但失敗失望後，就打消買機念頭。

現在要隔日買麵包做早餐，而勞小姐亦開始食包包，所以買麵包機這念頭又出現。上星期四同舊同事F食晏，佢話經舊同事H以員工價買咗麵包機，做出來麵包好似街賣廿幾蚊果D咁好好味，仲話拎俾心急人試下。心急人諗佢零烘焙經驗都成功，心急人應該0K嘅~等唔切試，星期五已經叫舊同事H落單 XD

心急人試過手造麵包，真係好攰要用好多時間，現在有咗呢部機瞓醒就有新鮮麵包食。麵包機真係偉大發明！

2013年10月17日星期四

Halloween @Ocean Park

細佬團購買多咗兩張飛又冇人要，結果心急人要咗。之前仲問朋友睇下賣唔賣倒，蝕讓都冇人要。每日放工返屋企陪勞小姐已經冇乜時間，無諗過會去Halloween。

其實今日勞力士有點攰，想返屋企唔想入去同人迫。心急人話都去到金鐘巴士站就唔諗上咗車先算啦~6:45pm上巴士，7:00到埗，以為會好多人，又唔係喎~天氣涼涼地有D風，幾舒服呀！

入到去就見到水池放煙花

見水族館未關門，就入去行下。心急人第一次去水族館咁少人可以慢慢影相，仲要張相無其他人入鏡。

行咗一圈就買雞脾醫肚，年紀大要行下坐下 XD

真南瓜雕刻，好靚好真！

上次入嚟圍板起緊嘅香港老街，真係幾懷舊，有好多嘢食，我地仲玩咗＂旋轉海馬＂（呢個名係心急人作嘅 ^^)，平時真係冇玩呢個。

坐低食煎讓三寶，喺呢條街又影咗好耐。

羅蘭呢個場先係重點，見唔多人排隊就排下，點知入到一個位先知原來裏面打蛇餅。勞力士想走，但一埸嚟冇玩重點項目有點浪費。。。結果玩完纜車都關門。

返到屋企勞小姐未瞓等我地，佢習慣夜晚要跟我地返屋企。如果要佢留宿媽咪家，現在應該唔可以啦！

今年海洋公園有全日祭，由10am 玩到10pm都幾好吖，夜晚嘅海洋公園又係另一個感覺。今日見好多人推BB車入場，下年可以考慮帶勞小姐入嚟Halloween 呀^.~

2013年10月14日星期一

第一次郊外BBQ

上星期中勞力士話想BBQ，心急人都想喎，快手約埋陳師傅幫手拎炭...hoho

有咗勞小姐後，每次都係去親戚朋友會所BBQ，我兩公婆都唔鍾意。今次小班製作寧願辛苦D去郊野公園。

前一日去taste買嘢，肉類自家醃製。心急人負責勞小姐用品，一個揹包剛剛放哂，帶定hip seat + 輕便BB車；勞力士就推車仔，放哂BBQ用品，食物加飲品。叫陳師傅嚟到買炭、叉+生命麵包，10點的士站等。

今日又係去麥邊，11點前到得返一個爐，有一半嘅爐外僱用緊，佢地好有規模，BBQ+打邊爐，又歌又舞！

勞小姐唔捨得爸爸走開去搵爐

呢爐都唔錯吖

有海景！

Yeah!

慢慢燒慢慢食，4：30就坐車走。

以前同親戚就會去香港仔BBQ，家住TKO去西貢最方便，去程坐紅的，因綠的好多人排隊，車費咪表$90 再加行李費$10，其實行李費唔係個個司機收，好多都唔收架！回程反而無紅的，唯有坐綠的，但司機話唔可以屋企門口落，只可以去到坑口MTR站，都冇計又費事繼續等車。佢冇的士證，佢可能係無牌替身司機，費事出事堅持唔俾我地落車，但佢冇收行李費，咪表$82。

雖然中途有落雨，但好彩冇影響。勞小姐好合作好乖，冇食奶食咗兩片生命麵包，返到媽咪屋企先食飯仔。今次試驗成功，下次可以買海鮮燒啦！^^