麵包香

上星期五落單，星期一送貨，效率好高！

跟機送3盒預伴粉

昨晚即刻用預伴粉試機，臨瞓前將材料放好，預定今早7點出爐。一早出廳就嗅到陣陣麵包香，夠鐘就要快快拎出嚟，怕佢慢慢塌下來XD

第一機好滿意啊！

切開好柔軟

麵包機一磅切得6片, 好難切8片~

媽咪: 我地咪冇得受惠囉

心急人: 你朝早上嚟拎俾daddy囉

媽咪: 遲D妹妹返學都要食麵包早餐, 你地一人兩片, 我地咪冇囉

心急人: 咁咪整兩機包囉

心急人買咁多樣嘢，媽咪最欣賞麵包機！

未有勞小姐之前已經好想買，又驚自己3分鐘熱度，又怕麻煩，試過問朋友借麵包機玩，但失敗失望後，就打消買機念頭。

現在要隔日買麵包做早餐，而勞小姐亦開始食包包，所以買麵包機這念頭又出現。上星期四同舊同事F食晏，佢話經舊同事H以員工價買咗麵包機，做出來麵包好似街賣廿幾蚊果D咁好好味，仲話拎俾心急人試下。心急人諗佢零烘焙經驗都成功，心急人應該0K嘅~等唔切試，星期五已經叫舊同事H落單 XD

心急人試過手造麵包，真係好攰要用好多時間，現在有咗呢部機瞓醒就有新鮮麵包食。麵包機真係偉大發明！

Halloween @Ocean Park

細佬團購買多咗兩張飛又冇人要，結果心急人要咗。之前仲問朋友睇下賣唔賣倒，蝕讓都冇人要。每日放工返屋企陪勞小姐已經冇乜時間，無諗過會去Halloween。

其實今日勞力士有點攰，想返屋企唔想入去同人迫。心急人話都去到金鐘巴士站就唔諗上咗車先算啦~6:45pm上巴士，7:00到埗，以為會好多人，又唔係喎~天氣涼涼地有D風，幾舒服呀！

入到去就見到水池放煙花

見水族館未關門，就入去行下。心急人第一次去水族館咁少人可以慢慢影相，仲要張相無其他人入鏡。

行咗一圈就買雞脾醫肚，年紀大要行下坐下 XD

真南瓜雕刻，好靚好真！

上次入嚟圍板起緊嘅香港老街，真係幾懷舊，有好多嘢食，我地仲玩咗＂旋轉海馬＂（呢個名係心急人作嘅 ^^)，平時真係冇玩呢個。

坐低食煎讓三寶，喺呢條街又影咗好耐。

羅蘭呢個場先係重點，見唔多人排隊就排下，點知入到一個位先知原來裏面打蛇餅。勞力士想走，但一埸嚟冇玩重點項目有點浪費。。。結果玩完纜車都關門。

返到屋企勞小姐未瞓等我地，佢習慣夜晚要跟我地返屋企。如果要佢留宿媽咪家，現在應該唔可以啦！

今年海洋公園有全日祭，由10am 玩到10pm都幾好吖，夜晚嘅海洋公園又係另一個感覺。今日見好多人推BB車入場，下年可以考慮帶勞小姐入嚟Halloween 呀^.~

第一次郊外BBQ

上星期中勞力士話想BBQ，心急人都想喎，快手約埋陳師傅幫手拎炭...hoho

有咗勞小姐後，每次都係去親戚朋友會所BBQ，我兩公婆都唔鍾意。今次小班製作寧願辛苦D去郊野公園。

前一日去taste買嘢，肉類自家醃製。心急人負責勞小姐用品，一個揹包剛剛放哂，帶定hip seat + 輕便BB車；勞力士就推車仔，放哂BBQ用品，食物加飲品。叫陳師傅嚟到買炭、叉+生命麵包，10點的士站等。

今日又係去麥邊，11點前到得返一個爐，有一半嘅爐外僱用緊，佢地好有規模，BBQ+打邊爐，又歌又舞！

勞小姐唔捨得爸爸走開去搵爐

呢爐都唔錯吖

有海景！

Yeah!

慢慢燒慢慢食，4：30就坐車走。

以前同親戚就會去香港仔BBQ，家住TKO去西貢最方便，去程坐紅的，因綠的好多人排隊，車費咪表$90 再加行李費$10，其實行李費唔係個個司機收，好多都唔收架！回程反而無紅的，唯有坐綠的，但司機話唔可以屋企門口落，只可以去到坑口MTR站，都冇計又費事繼續等車。佢冇的士證，佢可能係無牌替身司機，費事出事堅持唔俾我地落車，但佢冇收行李費，咪表$82。

雖然中途有落雨，但好彩冇影響。勞小姐好合作好乖，冇食奶食咗兩片生命麵包，返到媽咪屋企先食飯仔。今次試驗成功，下次可以買海鮮燒啦！^^

第一次去幼稚園open day

睇一仔blog先知有幼稚園open day, 今日同勞力士食完lunch就帶勞小姐去見識下XD

抱住勞小姐入幼稚園，佢一見到老師就揮手，勞小姐今日心情應該幾好。入第一個課室有3位教職員未有其他小朋友，有玩具有地墊啱哂仲未識行嘅勞小姐，玩一陣就有其他小朋友入嚟，勞小姐又開始興奮嘞！

玩多一陣，抱勞小姐係學校行咗一個圈就走。因媽咪要趕去BBQ, 心急人要去睇牙醫，兩父女就返屋企休息下。

其實今日一家3口同媽咪都係第一次去幼稚園open day，去完媽咪同勞力士都有講對呢間幼稚園嘅感覺，反而心急人冇意見。去完幼稚園心急人諗起自己讀幼稚園嘅情況。。。校舍好大，有修女，日日要念＂萬福聖母瑪麗亞。。。＂。

睇完牙醫就趕去超巿買嘢準備晚餐，點知兩父女嚟超巿搵心急人，仲係超市玩咗一陣~

玩完收到Daddy電話，Daddy唔舒服冇去BBQ上嚟食，心急人立即開turbo~

第一次打韆鞦

今日又是一個早起的星期天，早起執屋及開門俾鐘點姐姐。兩星期一次清理雜物，唔執唔得。。。鐘點姐姐要抹塵。

等鐘點姐姐完成廚房工作就到心急人入去準備午餐。清潔完食完已經點幾鐘，同勞小姐玩下、hea下、睇下電視已經4點幾，星期日時間過得特別快~

勞小姐13個月大，今日第一次帶佢去公園玩。成朝想佢瞓都唔瞓，5點半出門口先瞓，到公園叫佢起身，冇扭計仲即刻玩。見到小朋友好興奮好熱情會用BB話叫喊小朋友，勞力士話佢好豪氣 XD

玩完返媽咪到食飯，今日晚餐勞小姐食咗兩匙大人飯再加湯，好似又大個咗~

水豆針

今日早起拖地執屋為迎接OO帶仔女嚟玩，又要梳洗，又要煮早餐。。。好彩媽咪係度^^... 約咗12點去打水豆針，結果都係遲出門，坐taxi~

去到又係要等(車立)等好耐，如果有機會有多個BB，一定唔會再買package 打針，用太多時間，去屋企附近診所算啦！

勞小姐去到醫務所見到小朋又係好興奮，中氣十足，全場最大聲的一個。。。見到其他BB女都好斯文，勞小姐就豪氣十足~

一邊玩一邊等

入到去勞小姐同護士hi hi，䕶士好快手打完，勞小姐叫咗一聲，今日應該心情狀態幾好^^

打完就坐巴士返TKO，約埋勞力士食lunch!

返屋企途中OO突然來電話個女傷風咳唔嚟，唯有下次再約過啦！

返到屋企媽咪話發燒，做完facial要睇醫生。。。媽咪最近多咗小病，好彩每次都好快好。。。始終食藥冇咁好啦~

一家3口齊齊瞓，瞓醒今晚齊齊食飯盒~

呢個係最啱勞小姐口味嘅即食飯^^

國慶睇戲

今日約咗陳師傅一齊睇＂逃出生天＂，再一次證明心急人睇3D會頭痛、頭暈~

以為港產片。。。原來一個香港景都冇，扮港產片。。。又係俾大陸人睇嘅戲~

十幾年前嘅十萬火急好睇過逃出生天好多，更合情合理。。。起碼係香港消防，唔係中國消防；去慈雲山救人 ，唔係去越秀區；個個演員唔洗變哂大陸人。

睇完戲趕去餸回家煮飯^^

其實好鍾意入廚，但好少機會煮，只有退步不會進步。。。唉！