古兜溫泉

13 & 14號心急人去咗古兜溫泉兩天遊，全購物團，上車落車上堂食飯咁囉，一張相都冇影過呀。因為係免費團,緊係要帶人去買嘢啦。Mummy 一早叮囑過心急人不要浪費金錢去買嘢, 因為大陸人做生意好叻,欺騙人仲叻......

每到一處都要上堂聽講解，之後又要你食又要你買。他們介紹過有:

1. 蜜糖 - 去蜜蜂園聽一個約六十歲男人講蜜蜂的種類及職責(佢話自己養咗蜜蜂N年)，所謂的蜜蜂園其實係"難尾樓"地盤，但個男人話個蜜蜂園係屬於國家,又話自己係國家搵佢幫手喎...之後就緊係sell 蜜糖、蜂膠、花粉...，仲有一盅盅花粉燉鮮奶$20....佢哋態度十分進取, 不斷話"食啦!食啦!$10 gi ma, 點解唔食呀!" - 哼!心急人就係唔食唔買。

2. 石斛 - 去到一個叫XX科學園的地方(唔記得個名)，首先有個女人介紹d經過基因改造嘅南瓜、冬瓜、青瓜等等，其實全世界都推廣Organic，點解仲要種d怪物出嚟呢!個女人話個XX科學園又係屬於國家喎?! 之後就帶我哋睇生石斛（好似一棵草），講到好似仙丹咁，能醫百病。跟住要上課室，個課室好似睇宣明會到大陸探訪個d課室咁呀，個女人就sell 乾石斛，仲話佢哋係安記、東方紅、余仁生及裕華嘅供應商，即買即磨，講到唔買就走寶咁!!但心急人見到佢部磨粉機就驚，pretty dirty!!!緊接送上一盅盅石斛燉湯，唔該$25!!又係hard sell!!!- 哼!心急人又係唔食唔買。

3. 澳雪蘆薈產品 - 這次心急人以為是真，但買到返香港就知係假貨。個失職導遊話澳雪的廠房在中山，今次帶我們到澳雪廠房睇吓d 蘆薈產品。又係有個女人介紹Aloe 種類，跟住又入課室啦, 因為香港人對澳雪都有認識, 佢可以慳回不少氣力去推銷，只係話香港又一城有得賣，仲賣貴好多咁囉!!!心急人買咗Aloe牙膏 (佢話可以治療菲gi) 及Aloe gel (話200%Aloe)，買完才發覺個印在包裝盒上的香港地址是香港榮山大廈，冇樓層冇室號，加上同香港見到的完全唔同。今次心急人仲食埋個$20"蘆薈燉川貝"，結果又係被欺騙，唔係川貝係意米囉!!!

4. 茶葉 - 我們到了阿姨瑪水雲莊，佢哋話自己喺雲南嚟，國家叫佢哋推廣雲南茶葉，所有茶葉價格由國家釐訂（即售價比較貴），並會將錢送返雲南給小朋友讀書用。接待我們的九妹，口齒仱俐，十分生鬼。回港後 Mummy話佢都去過唔只一個阿姨瑪水雲莊，原來廣東省有幾個阿姨瑪水雲莊，每個接待人員講的話都是一式一樣，應該經過專業訓練。團內的婆婆都有買茶葉，她們話當做善事。

5. 濠江鉅記 - 唔好以為澳門間鉅記,完全冇關係。到達濠江鉅記，心急人第一時間上厠所，避過他們的熱情款待。有旅遊巴士到店舖門外，便會有音樂提示一眾員工有客到，他們以九秒九跑到門前列隊歡迎，接著人釘人sell 杏仁餅、豬肉乾......。朋友聽到有員工說"都唔買嘅!!"...哈哈,因為唔好食囉!!!

原本領隊安排十人一枱食飯，但心急人坐的一枱只有八個人，因為有兩位沒有出發。幸好，同枱食飯的團友都是斯斯文文，有三位好鍾意食魚又好幽雅的婆婆及三位好似來自澳洲的女士。心急人參加這個旅行團須付$100小費及$39保險費，包四餐(十分普通,除早餐外,每餐都有八餸一湯白飯任裝)加一晚住宿(不是豪華)，覺得可以接受。如果要付團費(團費為$3xx)，心急人一定不會參加，相信這種旅行團只可以做粵港澳湛人的生意。