Monalisa 影相日

Monalisa 影相日

文章日期：03/01/2010 11:33 pm

噚日同勞力士就去咗旺角同玄學斌飲茶, 飲完茶去咗金都行一陣,跟住搵傳聞中嘅樓梯底阿伯買婚紗鞋,都容易搵,$80 成交咗~

仲要去花墟買花做頭花, 因為好難搵到開哂嘅花，而小牡丹又係貴，買買下都買成$100......顛咗~

為準備今日影相, 2月28日勞力士去咗拎花球啦。

一早出發, 心急人同勞力士都係穿白色波鞋, 穿足成日無換過鞋, 因為攝影師Kevin話影唔到對鞋，所以$80婚紗鞋無穿過。

在維德olive食早餐後, 行去碼頭。因為剛剛走咗班船，要等多半個鐘，結果遲成個鐘先去到呀!
第一個造型心急人要求用自己頭髮唔加假髮，加鮮花配輕巧白婚紗。好彩個化妝師好有經驗，勁快手，12點15分出車向山頂出發。沿途Kevin不斷問心急人同勞力士鍾意乜嘢唔鍾意乜嘢, 都幾好傾呀!上到山頂好多遊客，好多部相機對住心急人呀, Kevin問心急人驚唔驚, 心急人一點都唔驚, 仲覺得自己好似明星tim
回程時, Kevin仲幫心急人同勞力士order 飯盒, 都幾細心架~
第二個造型Lilian話加假髮，但心急人唔鍾意太長要求短少少再加鮮花配粉紫色晚裝。食完飯，接住要去馬灣公園影相, 其實馬灣公園好細咋~
心急人同勞力士要求取消影沙灘，結果多咗好多時間影室內。
第三個造型Lilian話側邊加少少假髮加珍珠頭飾配白色婚紗。第一&二個造型Lilian都用咗紫藍色眼影，心急人諗住戶外都可以淺色d, 就無要求加上紫色。到第三個造型心急人要求Lilian加深紫色眼影。心急人最鍾意依個造型又鍾意影室內，所以影咗好多張相。影完室內，就等青馬大橋開燈，等咗一陣影埋就收工啦~
依張係唯一一張用心急人相機影嘅相, 心急人話同攝影師影番張相先有咋...好高大靚仔嘅攝影師Kevin(手持相機)及好怕羞嘅Alan。今次心急人無搵錯攝影師及化妝師, 當然要多謝blog友分享啦~

行到出碼頭成8點, 半個鍾一班船，都係食埋先走啦~
$49一個餐,有例湯及餐茶，幾好食喎~

坐九點船返中環, 今日完滿結束~