3rd - 贊育超聲波

今日約咗2:15pm 到贊育照超聲波，心急人同媽咪1:40pm 就到咗，一邊食麵包一邊等職員開工...

其實去政府照係冇嘢睇到，心急人只係問咗BB幾多磅，醫生話有6磅架啦~
BB都唔係好重啫....但心急人就行得好吃力~
照照吓醫生話要搵護士幫手抬起BB個頭，因為BB個頭阻住佢要睇嘅地方，叫心急人唔洗擔心，唔會傷害到 BB......都幾唔舒服~
醫生話胎盤仍然有少少低，佢話會寫report 去QM 架啦~
因為已經36w，唔洗再約時間到贊育照超聲波，準時到QM產檢就可以。

跟住 3:15pm 同媽咪去舅母到食Tea...媽咪最愛吹水~

QM 產檢 (36w+)

又到星期一，又要去產檢...今日冇食lunch，上到QM先食媽咪買嘅麵包.....
今次見到上次留院隔離床孖仔媽咪，原來佢喺心急人出院嗰日夜晚就開始陣痛，結果零晨開刀....雖然未足月兩個都有5磅，好細粒人仔呀~
佢話傷口仍然好痛...五日仲好痛~

坐咗一陣，入去量血壓....唉....結果又係高
今次又好好彩遇到個好醫生，佢叫印度學生幫心急人檢查，跟住醫生同心急人量多次血壓話正常番...結果唔洗留院走得 ^0^

好開心走得，同媽咪去咗池記食Tea...媽咪好眼尖見到何守信同老婆埋單俾錢~

QM 產檢 + 留院 (35w+)

今日好趕食唔到 lunch, 2點要到贊育驗B鍊，唔洗等第一個就係心急人，感覺好似做婦科檢查咁有少少痛，護士好有經驗好快手，唔洗半個鐘就走得。
跟住坐的士上QM，去到坐一陣先入去量血壓，但仍然高.....(心知不妙~)

今次醫生同上次一樣，仲有兩個醫科五年級學生係度，心急人見嗰個醫生係副顧問醫生，佢吩咐個學生幫心急人檢查，仲問個學生有乜findings...
心急人好似白老鼠...唉...當貢獻下俾香港醫學界~ 嗰學生好緊張手震，攞尺都倒轉，可能血壓仲高過心急人....

今次醫生又要心急人即時入院觀察，有上次經驗，今次已經唔緊張，只係覺得麻煩...
上K9S病房登記，再量一次血壓，再落地下攞label...跟住同媽咪去大家樂食下午茶先上病房。

今次遇到全病房最克人憎嘅護士，黑口黑面，又粗聲粗氣...
瞓床度宮縮時，呢個護士又話唔係咁瞓....心急人又唔係第一次度宮縮，唔係咁瞓又唔講點瞓喎...
佢俾個樽仔心急人留尿，話聽日9-5 office hour 留.....點知佢翌日6點幾就嚟問留咗尿未....佢精神分裂...入院嗰個應該係佢~
心急人拉簾瞓覺，佢又話唔好拉簾呀, 醫生要巡房 (醫生巡房時都要拉簾啦~醫生話尊重病人私隱)，又話呢度唔可以叉電呀.....都唔知佢邊隻眼見到心急人叉電 (唔通佢未用過USB充電器)

好彩翌日有個好好人嘅護士長，心急人唔洗再對住黑面王。
其中有位太太小產冇咗BB，初時心急人還以為佢生完，仲問佢BB係邊呀，佢話無咗....心急人見佢好堅強又唔想騷擾佢，只講咗兩句安慰說話。呢個好好人嘅護士長一返工就去慰問呢位太太，仲同太太講有唔開心可以發洩出來，太太嘅堅強同冷靜有點不正常，令佢好擔心....護士長嘅說話好窩心~

今次都係瞓得唔好，夜晚好多人入院...隔離床都係半夜入院，懷孖仔媽咪原本約咗下星期二37w1d開刀，但因為不規律陣痛而入院...QM有好多孖胎 ^^

今次冇senior 醫生過嚟睇心急人，心諗緊係唔俾心急人出院要住多一日...上午得一個junior 醫生走過嚟話叫屋企人帶屋企部機嚟醫院睇吓同醫院部機有冇出入...
媽咪 lunch 嚟探心急人，心急人見全無跡象可以出院，1點叫媽咪返屋企先唔好等...點知1點後醫生過嚟話睇埋3點嗰次血壓 & 比較兩部機，再決定可否出院...
結果3:15 pm 知道可以出院啦 ^0^

QM 產檢 (34w+)

一般人應該36w 先到QM見醫生，如果無特別問題就可以轉返健康院或贊育產檢。
心急人有血壓高問題，所以成個file 放係QM, 由34w 開始已經要到QM產檢...咁都好有醫生睇住，感覺安全D~

今日約咗媽咪去大家樂食叉燒飯，跟住坐小巴上QM.....
一見到量血壓部機已經心跳加速，仲要俾醫院阿姐話心急人"尿好甜"....心跳得更快

好彩今日個醫生好好人，佢話心急人上次入院個驗血報告好正常，唔似有妊娠毒血症...睇埋心急人係屋企自己量嗰record，佢俾心急人返屋企。
雖然心急人已經帶齊日用品隨時準備入院，但個心都係想返屋企，留係醫院又唔舒服又悶又瞓唔到...

打風過後...可以出院

打風過後...可以出院

文章日期：07/24/2012 11:00 pm

今日早餐 - 肉碎粥+烚雞蛋...

大約九點，有一位高級女醫生巡房，話最近兩次量血壓已經低少少，最好留多一晚觀察...心急人同佢講想今日出院，咁佢就同護士講睇埋下午情況...
大約十一點，又有位年輕男醫生巡房，話心急人血壓稍高，要等驗尿報告有冇蛋白尿，待確定係唔係妊娠毒血症。心急人擔心如果要食藥會影響BB...醫生話俾得心急人食就一定唔會影響BB...(點講都會擔心架啦~)
終於等到12點探病時間，媽咪攞咗skin care + 生果+蛋糕俾心急人。阿姐準時12點派飯，住醫院真係好想見到屋企人...
媽咪跟住去咗阿姨屋企，心急人冇心情用skin care，繼續瞓床....過一陣有位年輕護士走嚟話一陣兩點幾會有人嚟量血壓，叫心急人唔好郁聽吓歌放鬆心情，醫生下午嚟睇結果再決定可唔可以出院...(咁樣又有壓力...)

年輕男醫生三點就嚟心急人床位，話驗尿結果正常，唔係妊娠毒血症，但血壓摘界，現階段唔洗食血壓藥...可以俾心急人出院，但要心急人係屋企一日量兩次血壓，下星期一攞埋血壓記錄覆診....仲叫心急人有心想準備遲D有可能要食血壓藥及再被捉入院...

心急人問醫生是否遺傳、是否要介口....
醫生話一定唔係遺傳，如果要遺傳唔洗等有BB先傳到; 又唔洗介口，因為係懷孕胎盤影響，只要放鬆心情就得....
好奇怪...心急人一直只擔心有妊娠糖尿病，從來冇諗過會血壓高，因為未有BB時做body check 醫生話心急人屬血壓低...而懷孕過程又冇好緊張，只係心急人個性比較性急啫...

醫生走咗，心急人終於鬆一口氣，有心情同其他產婦傾計、交流吓....朋友OO仲話有機會俾心急人預習一次入院程序...

大約4點心急人等姑娘嚟俾覆診紙+出院紙...
同媽咪一齊離開 ^^


以下呢副相係勞力士一早whatsapp 俾心急人...入咗一晚醫院，屋企樓下就變成咁~
噚晚吹正東北風，水從冷氣機入，勞力士話返到屋企就不停抺地，抺到三點幾....真陰公~

瑪麗...颱風...

瑪麗...颱風...

文章日期：07/23/2012 11:00 pm

今日返工時已經3號風球，又一次產檢遇上打風...行出IFC天穚時，風大得很，連心急人都吹得郁
約咗媽咪在上環，行過見到有間新開越南餐廳入去試吓，服務&食物都好好，下次可以再光顧

食完出嚟好大雨，慢慢行去西營盤健康院攞簿仔，再坐的士去瑪麗。2:45 pm到瑪麗登記，以為只是見醫生聽超聲波報告，原來都要磅重、驗尿、量血壓...
醫生話胎盤2 cm 為合格，心急人有2.1 cm屬僅僅合格，可以順產，如果再高一點更為理想...
好消息後，就到壞消息。。。因為量到血壓高，醫生要求即時入院觀察
有兩個選擇，一係即時入院、一係明早8：00入院。。。原本諗住明早入院，知道將會掛8號風球，又唔想走來走去。。。唉，結果亳無心理準備下選擇了即時入院。好彩今日有媽咪陪伴，個心都定少少...

大約5:00 pm 上到K9S，護士登記完要換粉紅色衫及留多一次小便，跟住check 宮縮 & BB心跳，check 咗半個鐘差唔多6點。探病時間為6-8 pm，媽咪真係要等到6點先可以入嚟病房...6點準時派飯，這是心急人懂性後，第一次入醫院，第一次食醫院餐~

8號風球大風雨下，勞力士放工要幫心急人買日用品，全身濕透搵咗大半個鐘先有的士上瑪麗，嚟到已經7:40，8:00就要走。。。真係辛苦哂，好感動~
Daddy 放工都上咗嚟探心急人，好開心~...出面真係好大風大雨，咁啱勞力士姨媽都係瑪麗探姨丈，有順風車送到屋企門口，真係唔該哂

佢哋走哂，飲完醫院提供嘅鮮奶...心急人就去卸妝洗面刷牙...原來醫院唔俾人化妝，心急人登記時，護士已經叫心急人抺走化妝品...跟住返到自己床位時，又有個阿姐叫心急人卸妝...當時勞力士都未上嚟，邊有嘢卸呀...心急人化妝阻住佢哋咩...真係奇怪~
之前仲搵定合適嘅BB cream放入走佬袋，諗住有人嚟探BB時，心急人唔洗咁樣衰...化個靚妝影吓相~

10:30 pm 已經上床準備瞓覺，但...因有兩位媽咪生完屬follow up case，同BB一齊留在K9S...不時有BB喊聲，出面又有拍打玻璃窗嘅雨聲風聲，加上阿姐12點 & 3點嚟幫心急人量血壓，而心急人又擔心自己....心急人根本無法入睡...全完緊貼著天文台嘅颱風消息~

 

 

直至零晨三點忍唔住用headphone聽radio 2先可以瞓到6點幾...

勞力士去東莞

上次去老爺到發覺客廳部DVD機有問題，勞力士係香港買咗部新機，今日攞上去安裝，瞓一晚明天返香港。

媽咪主動話陪心急人瞓，媽咪第一次係心急人到瞓，佢好似去宿營咁

麻煩

剛剛收到贊育職員電話，話上次超聲波 report 出咗，要心急人下星期一3:00返瑪麗見醫生...最好帶埋本簿仔去見醫生...
唉...心急人噚日都想攞返本簿仔走，但個姑娘又話唔洗攞...

即係要心急人星期一去健康院攞完本簿仔再上瑪麗見醫生....
職員仲話星期一見醫生後，會安排下次覆診地點...可能唔洗再去健康院，直接到瑪麗或贊育覆診...

因為瑪麗/贊育同健康院冇溝通，心急人要去多一次健康院攞返本簿仔...今時今日資訊時代，應該按一個制就搞掂，仲要人手速遞本簿仔~

4th 西營盤母嬰健康院 (32w+)

上次經過上環見有間新開嘅餐廳，媽咪話下次去試吓...
今日去到要排長龍，差唔多1:30先有位，1:40落單....等到2:00連餐湯都冇...
心急人決定轉場...去新釗記食算啦~

今日去到健康院已經2:45pm，第一次量血壓稍高，要等15mins再量多一次...見姑娘時，姑娘話心急人血壓摘界...
BB心跳正常，而心急人嘅腳腫問題...姑娘叫心急人唔好成日出街食飯...(真係好難做到~)
媽咪聽完姑娘意見後，要心急人晚晚返屋企食飯~

17/7照超聲波，贊育又冇俾 report 心急人，健康院姑娘又唔知心急人有冇問題...健康院姑娘只話心急人冇特別問題要留返係健康院覆診，而本簿仔又要繼續放低係健康院，兩個星期後再覆診...到36週先返瑪麗見醫生~
明明上次照超聲波嗰醫生話會轉返去瑪麗/贊育睇架嘛~

今日4:45先走得~

爆肚紋

爆肚紋

文章日期：07/17/2012 11:00 pm

今晚沖涼前個肚底有少少痛，好似撕裂嘅感覺，心知不妙...
沖完涼就攞塊鏡照吓...真係爆肚紋呀紅色...好似靜脈曲張咁~
心急人一直以為冇....點知今日就出現咗~

之前聽人講肚紋係因人而已，如果有肚紋嘅人搽乜都會有肚紋，冇肚紋嘅人唔洗搽嘢都唔會有~
初時心急人仲想唔搽嘢...但朋友們都叫心急人搽定先...
有一日經過中環八珍甜醋見到有支可以預防妊娠紋嘅油 - wheatgerm oil，sales 話可以同oliver oil 一齊用。心急人就由懷孕4個月開始用，點知都避唔到，肚底左右兩邊出現紅色肚紋...

2nd - 贊育超聲波

星期六睇潘醫生話胎盤位置正常,...但今日去贊育睇醫生話胎盤低少少, 又要我14/8再照一次，到時已經36週啦...

有時真係好懷疑政府...

P.S. 真係好多謝媽咪陪心急人睇醫生...世上只有媽媽好!!

老公生日

老公生日

文章日期：07/15/2012 11:00 pm

噚日返媽咪到食飯，所以提早一日切蛋糕，呢個蛋糕係勞力士自己揀架，勞力士喜歡檸檬味，但心急人就覺得好酸~

今日冇乜特別節目，鐘點一早來清潔，勞力士就去咗做gym，下午瞓咗一陣，成六點先出去食飯。一早book咗南海一號，服務比之前好好多，食物一樣好味，勞力士好滿意

返到屋企心急人特別整咗個鮮奶燉雞蛋...好好味!!





祝勞力士身體健康!!
出年同BB一齊...唔知去得邊呢...?

5th - Dr. Poon (32w)

上個月睇唔到BB個樣，心急人就決定睇返潘醫生，起碼都照耐D又清楚D吖~原本約咗3:00pm，但醫生有手術要延至4:00pm。

今日同媽咪、勞力士係康怡食完lunch，行一陣吉之島就去潘醫生到。去到量血壓驗尿磅重...又重咗...真係好驚~
第二個就到心急人，向醫生匯報吓近況就去見BB，一照醫生就話BB"唔順超"，hahahaha...BB扁哂咀咁~
再照先正常返...醫生話 BB有頭髮有肚腩，重4 lbs 12 oz，以32週嚟講，算重架啦...仲叫心急人唔好食咁多甜嘢!

其實4D都唔係咁清楚，好似潛水時影相咁樣...但睇完真係好開心，所以趁勞力士去厠所時，心急人就book咗 下個月照多次
今次潘醫生收$1000，有維他命、4D相、DVD....收平咗

睇完就去攞生日蛋糕啦~

溶解黑頭 Fancl PORE Cleansing Pack

有咗BB之後，皮膚變得好乾，之前濕度100%都要全身搽cream~
面上黑頭更加一發不可收，要keep住兩星期做一次facial，好勤力!
呢排成日係電視見到"溶解黑頭"嘅廣告，心思思想試吓，但一直都冇用開呢個牌子，噚日經過終於忍唔住入去睇吓。一盒8包，每次用一包，敷3mins，Sales姐姐建議日日用，用足兩星期，如果嚴重就用足一個月。心急人買咗孖裝$298 (孖裝送多1pc，total: 17pcs)，又唔係貴喎~

返到屋企沖完涼試吓，幾方便一包用一次，第一次用效果都幾明顯，毛孔細咗，黑頭少咗，心急人都好滿意

3rd 西營盤母嬰健康院 (30w+)

今日又同媽咪去大舞台飲茶再慢慢行去健康院，又係好多人，有孕婦冇位坐，醫院阿姐搬櫈不停叫孕婦坐，仲話"你地無位坐，我會俾人鬧"...
量血壓、驗尿、磅重......磅完好驚....重咗好多，聽人講成個懷孕過程應該最多重30磅，但到今日為止已經重咗28磅啦~

心急人又問姑娘有關水腫腳，姑娘話心急人腫得快咗D，如果血+尿冇事，就食少D咸嘢、提起雙腳...
姑娘話今次要放底本簿仔，兩星期後要返嚟覆診，唔洗係出面等，走得架啦~
今日3:30pm 己經走得，真開心~

跟住落咗CWB教協、又去咗DHC攞嘢、無印買嘢，再去老三楊買上海粽....兩個超攰咁返屋企~
下次都係直接返屋企瞓吓覺

無端端去東莞

無端端去東莞

文章日期：07/02/2012 05:56 pm

Daddy 成日問勞力士幾時去你Daddy屋企呀...

雖然心急人唔係咁想去，唔想食大陸嘢，但又唔想唔啋Daddy，唯有就範啦~老爺同勞力士講話心急人個肚越來越大，係去就快D啦...

趁有假期，產前就走一轉東莞嘞~
今日係屋企食完早餐，8點出發坐mtr到羅湖再轉和諧號到東莞，一到步就去飲茶，Daddy 媽咪話點心好味...去呢間酒樓係老爺指定動作，次次都係去呢間，冇其他選擇~

跟住就返屋企休息，媽咪竟然一入房就瞓係張床到，仲叫心急人一齊瞓，結果全部瞓哂，得老爺係間屋到行來行去...

瞓醒老爺就帶大家遊花園，仲去咗勞力士姨媽間屋到，Daddy 見到有好多芒果好似好開心咁，老爺就叫勞力士返屋企攞key入屋摘芒果...
結果摘咗三十幾個芒果

6點幾就去會所食飯 (又係指定動作)~
今日大家好早就上床瞓，Daddy & 勞力士兩點幾要起身睇波~

第二日成12點先出去飲茶，飲完茶老爺返屋企先，勞力士心急人同Daddy媽咪就行街街，坐5點幾車返皇崗，返到香港差不多8點幾啦~
求其去椰林閣食完晚飯就返屋企啦~

心急人問Daddy媽咪係唔係好悶呢? 佢哋竟然話唔悶，仲話下次帶埋BB一齊上去玩~仲話老爺間屋好乾淨好舒服，比佢想像中好...hahahaha, 緊係啦, 老爺每星期請人清潔，而媽咪咁懶成日唔執屋~

2nd 糖尿測試

2nd 糖尿測試

文章日期：06/30/2012 11:00 pm

噚日下午天文台話會打8號風球，心急人仲驚緊冇得做糖尿測試，打電話去問如果打8號風球點算，職員話星期一或二會有專人打電話俾心急人再作安排，咁都安心D~

夜晚11點幾掛8號，好彩零晨3點已經落哂風球，唔洗再約過第一次咁唔想打風~

今日第二次到瑪麗做糖尿測試，9:10到已經派到120籌啦...9:45先飲完糖水，11:45再抽血。

今日媽咪好醒目買定麵包，11:45抽完血就可以即刻醫肚，慢慢行去坐小巴落CWB，等勞力士一齊食上海嘢

小強累事

今朝一落樓check 電話就見到叔叔&妹嘅miss call，心知不妙....叔叔問Daddy手提就收線，心急人就即刻打俾妹，妹話嫲嫲打"小强"整親隻手...

咁啱今日媽咪又行唔到(骨膜炎)，要Daddy趕返嚟陪佢睇醫生...
Daddy唯有叫工人陪嫲嫲睇鐵打...

心急人唔放心，lunch 時間返入去睇嫲嫲，原來佢半夜3點起身去洗手間時見到"小强"，"小强"就打唔到，自己就跌落地撞到膊頭 (仲要係佢用開嘅左手)...痛咗成晚，到朝早先打電話俾叔叔，但叔叔又上緊大陸喎...
同嫲嫲食完飯盒(有工人都要食飯盒，個工人係癈嘅~)，心急人就走咗嘞，嫲嫲成晚冇瞓，需要午睡...

今次又俾嫲嫲嚇死...(佢自己話隻"小强"累佢洗成千蚊睇鐵打呀~)

Sky100

Sky100做promotion - 龍年出世生日月份免費入場，所以心急人免費入場，而咁啱團購又有Sky100入場券買。Daddy 今日放假，媽咪決定今日去，可惜今天是下雨天

Daddy & 媽咪今日一早入沙田睇畢加索，約咗佢哋3:30係TST等。今日真係太大雨，費事行都係坐TAXI去圓方。行一陣Three Sixty，先上去Sky100，仲以為乜都睇唔到，雖然唔清楚但好彩都睇到~

係Sky100都hea咗好耐吓...跟住就返尖沙咀食飯...今日當做父親節架啦~佢哋明天游船河呀!

忙...飲茶

忙...飲茶

文章日期：06/10/2012 11:00 pm

今日勞力士有嘢要同老爺傾，所以心急人可以遲少少出門，12:45先到酒樓。遲咗少少啫...老爺係咁吹，大肚婆係行得慢......心急人去到成身汗...
食咗少少嘢，好快1:30就走，之後指定動作去超市掃貨...又話買少少嘢，點知又係買好多嘢。勞力士同心急人又要陪佢由太子去九龍塘坐車。

又由九龍塘去tst趕下場，因為約咗勞力士堂妹飲茶，佢話有嘢俾BB，心急人一直以為係坐奶器..原來係電消毒奶樽器。約咗2點半，心急人同勞力士3點先到，好彩佢有個囡陪，傾到4點半又要趕返屋企放低d嘢，同媽咪再出發去Popcorn 等Daddy食嘢睇戲。

齣戲無想像咁好睇...有一點悶~

 

2nd Dr Fung (27w) - 遮住哂

今日預約咗Dr. Fung 1:30pm，去到又係好多人...磅重、量血壓、驗尿後，同媽咪&勞力士去食嘢先，費事浪費時間~
剛剛食完就收到姑娘電話，返上診所好快就有得睇嘞~

Dr. Fung 話BB一切正常，重2 lbs 9 oz，只可惜臍帶漂到BB面前遮住BB，而BB又用手遮住自己塊面(好似好曬咁~)...唉...今次就係浪費$$啦~
Dr. Fung話遲D胎盤會慢慢升，叫心急人唔洗擔心 (其實心急人冇擔心...只想快D知要唔要開刀，如開刀要揀日子之麻...)

睇完去咗荷花，荷花做緊特價，人人上去都係VIP價，今日終於買咗張BB床，19/6送貨^^
今日仲買埋一直好猶疑唔想買嘅孕婦沖洗器...朋友話買咗冇用，但聽講座時姑娘又話要用~

跟住去咗Sogo，行完超市勞力士走先，心急人同媽咪繼續行街，媽咪對馬騮仔袋情有獨鍾，唔知點解咁多媽咪鍾意馬騮仔袋.....佢又揀啱一個，就當生日禮物啦~

2nd 西營盤母嬰健康院 (26w+)

同勞力士講今日去大舞台，佢話:去做乜呀~ 心急人答:去結婚呀~
今日約咗媽咪去大舞台飲茶，好耐冇去過啦~ 大住個肚去緬懷一吓!!
坐到兩點幾就慢慢行去健康院，預約時間3:00，2:50到達，今日好多人，大堂坐滿人...
結果等到4:15先有得見姑娘...又係問吓嘢、按吓肚、聽吓心跳就走得~
等埋預約紙，4:40先走得...咁又搞咗兩個鐘~ 真係好無聊，唔去又唔得~

跟住同媽咪去咗銅纙灣行一陣就返屋企啦~
因為勞力士要留假，之後媽咪都會陪心急人去覆疹...世上只有媽媽好