＊＊K1 報名、面試、結果、註冊＊＊

成日聽人講話一有出世紙就要報幼稚園, 心急人都覺得好誇張, 一於少理......因為覺得咁細個去邊都係玩，最重要環境衛生清潔，佢玩得開心就得。勞小姐9月出世算是細B，從來冇打算報讀N班，怕未有足夠抵抗力抗菌。當勞小姐讀K1時， 勞二妹已經6個月大，為免加重媽咪負擔，只會揀屋企附近10分鐘路程內的幼稚園，如果有全日班更為理想。

一共報了五間幼稚園:

(1)  比諾 - 有去學校開放日，地方大但環璄、玩具都殘舊。勞力士發現窗簾爛咗只用夾夾住; 玩具又甩哂色...媽咪叫心急人唔好報名慳返報名費，但心急人諗住報咗面試當採排，報了全日班。

(2)  保良局方王 - 2013年已經去過學校開放日，地方大環璄清潔，老師後生，又多課外活動。報名時媽咪視為次選，報了上午班。

(3)  青衣商會 - 學校沒有開放日，但有預約參觀學校。心急人沒有參觀學校，勞力士就覺得好乾淨，學校夠光猛。從媽咪得知青衣商會口埤好，多人報名，加上有全日班，媽咪視為首選，報了全日班。

(4)  坑口宣道 - 媽咪話有街坊孫仔讀過話幾好，只知有全日班。五間幼稚園中認知最少，報了全日班。

(5)  救世軍慶恩 - 有去學校開放日，地方大環璄亦可以。救世軍有出世紙就可以報名，五間幼稚園中心急人最早報名的一間，還是比別人遲報名，報了上午班。

除以上5間，心急人都有考慮報明德救世軍及厚恩，兩間都有全日班，但可惜到想報時已經太遲了~

面試
由11月1日開始連續3個星期六都要面試，好似好忙 ^^

1/11
天朗氣清的一天，勞小姐心情特別好，今日見兩間都表現好好呢!

9:00am 比諾 - 在大堂睇介紹學校的幻燈片，校長講話，跟住小朋友分組由一位家長陪同入課室玩玩具，大約15mins。校長好hard sell, 知道唔會讀就當去玩下啦~

返婆婆家休息一陣後
11:30am  保良局方王 - 心急人入到去嚇一跳, 真的很多人，仍未見完11點的一批，11:30又到了...大堂擺放大型玩具有滑梯、隧道給小朋友玩，但沒有櫈給家長坐。等了差不多45 mins 才安排4位小朋友及家長入課室，老師會觀察小朋友反應及對話。勞力士話勞小姐表現好好，有問必答，還執好玩具才離開課室。

8/11
天陰有雨，勞小姐心情跟今天天氣一樣......

11:10am  青衣商會 - 大雨下，勞小姐坐著BB車到學校，校內已經有好多小朋友，勞小姐心情唔好又開始眼瞓，玩乜都同人爭...唯一一次一家三口一齊入課室面試，今次好似睇醫生咁一對一面試，心急人肚太大不能坐小童椅只好站著。勞小姐見到老師唔想坐調頭想走(心知不妙)，開始想喊(老師樣子比較嚴肅)，...老師俾咗keys + 圈圈俾勞小姐串，勞小姐整跌keys就開始喊，仲要搵婆婆添。心急人細細聲同佢講媽咪出去搵婆婆，心急人就出咗去留下兩父女繼續面試。事後媽咪有點失望，心急人又冇感覺喎~心急人第一次到這學校，感覺又不是媽咪講到咁好...

11:45am  推住勞小姐趕下一場，入到課室聽校長介紹學校，跟住分小組入課室玩 + 聽故事，故事內容講變魔術，勞力士話勞小姐怕變魔術。勞小姐出嚟講返老師講嘅故事俾心急人聽，好好笑 ^^
這間學校比較細，有點暗....(媽咪話今日落雨嘛~)

15/11
天晴...心急人一直以為今日11點到救世軍慶恩面試，勞力士9:15am 睇下張紙原來是9:00am 開始，勞力士開turbo同勞小姐著衫，去到都已經9:40am ,要等下一場10:00am，好彩啫~
勞力士話今次又係分小組入課室，跟住出大堂玩玩具，老師會留心睇住小朋友玩玩具情況。勞力士好醒引勞小姐玩有人玩嘅BB，避免佢同人子爭玩滑梯 ^^

結果:

(1)  比諾 : 下午班
(2)  保良局方王: waiting list
(3)  青衣商會: reject
(4)  坑口宣道: 上午班
(5)  救世軍慶恩: 下午班

冇全日班offer，只有一間有上午班offer。心急人立即上baby kingdom 搵有關宣道comment，好彩口啤都唔錯，只係校舍細咗D，加上勞小姐有位朋友仔都會一齊讀宣道上午班，希望到時有個伴，會容易接受。有結果後，下一個問題就係寫唔寫信轉全日班...勞力士&媽咪開始猶疑，唔捨得勞小姐留在學校午睡。

註冊:

心急人請媽咪一早到坑口宣道註冊，心急人最後都冇寫信求全日班學位，總算快完成一件事。點知到12點收到慶恩電話話上午班有位，可以下午註冊，同媽咪商量後唔會考慮慶恩，除非收到保良局方王再作考慮啦!