＊＊產檢＊＊

25/10/2014: Dr. Poon 照結構
今日去到驗尿竟然血糖高，心諗死啦又衰多樣嘢．．．Dr. Poon 問心急人今朝食過乜嘢，心急人食完沙爹牛肉公仔麵＋阿華田就去坐車
Dr. Poon 話唔好食公仔麵，食通粉 or 米粉．．．公仔麵大忌．．．
原來公仔麵係咁毒～
好彩返到屋企，用媽咪血糖機量正常返，感恩！！

其實Dr. Poon 上次已經話BB 係女仔，今次再問多次，佢話俾埋張”咸相”我喎....hahahaha
BB一切正常，矮咗少少，要飲多D奶....已經一日一隻蛋、一支鮮奶啦~

27/10/2014: 贊育照結構
今日BB位置ok，醫生又好快手，政府醫生都唔會講嘢，諗住前兩日先睇完Dr. Poon, 心急人都費事問，想快回家^^

4/11/2014: QMH 產檢
上次入院後，心急人已經唔需要去健康院或贊育做產檢，以後直接上QMH，可能方便入院啩．．．
今日見嘅醫生Dr. Chung，即係上次入院睇住心急人嘅醫生，其實第一次懷孕都係佢睇．．．後生靚女醫生一名^^
今次量都係高，上次入院驗血報告ok，所以都可以走得，但日日要早晚量一次，下次要交功課．．．
心急人已經換過另一部血壓機，made in Japan，應該會準確D～
睇完總算鬆一口氣！５星期後再嚟過~

9/12/2014: QMH 產檢
今日又係預咗血壓高，Dr. Chung 都好俾心急人走，但要去抽血留小便，下次要提早D覆診，３星期後再嚟～
其實11點已經睇完，但QMH 改了抽血流程，結果抽血等咗成兩個鐘．．．激死！！

QMH渡假

第一次懷孕後期常因血壓高而被捉入院，造成血壓高陰影...這個陰影真的很大。產後到診所body check又好緊張又高，總之一去診所就會高，所以好驚9月23日的來臨~ 前一日仲去屈臣氐買部新血壓機量血壓...

今次懷孕旅程所有政府安排的產檢都會自己一個人去，因為媽咪已經要湊勞小姐...人家說大肚婆好似做女皇，但這說法只可以套用在第一次懷孕，待小公主出世後，心急人已變回平民...

有多不願意都要準時到達，今次血壓又係高...醫生問: 你想依家入院定明天入院, 或者星期六日都可以架?
心急人肯定唔會揀星期六日啦, 又唔想即時喎, 十萬個不願意結果揀咗星期四五(25-26/9)...
醫生話: 咁你留院時一次過飲埋糖水啦~

25日在main block登記完就直接上K9S, 安排好床位，勞力士就返工，心急人又要量血壓、等抽血、等飲糖水....
雖然K9S對心急人來說不陌生，但心理壓力一定有...每次入院都渡日如年，四小時量一次血壓，只是觀察...今次抽咗10筒子血

26日早上醫生話可以走得(心急人都估到~)，但要在家留48小時尿，每日要送回QMH...等到3點醫生簽出院紙才走得，心急人要拎3個大玻璃樽回家，好彩有Daddy接回家...

返到屋企成個人鬆哂，即刻同Daddy、媽咪、細佬 & 勞小姐食下午茶 ^^



28日(星期日)要麻煩勞力士; 29日(星期一)要麻煩Daddy交回玻璃樽...因為星期一佔中開始，結果Daddy由QMH 返公司要用多兩小時, 唉....點解要損人不利己呢~

贊育登記

同勞力士食完早餐就出發去贊育, 電話預約9:30, 我地9:10到達, 攞9:30 6號籌, 等一陣就派書仔及度高磅重, 書仔填好個人資料就交返俾護士。今日好多人，同上次一樣好多外籍媽媽,護士要用eng講多一次登記、產檢、入院流程。

第二次懷孕沒有興奮心情，只想快快離開...等到11點終於見護士...繼續等抽血。12點終於到心急人抽血, 抽4筒血後, 跟住上三樓再等做Oscar。好彩唔係等好耐, BB又合作, 順利做完Oscar。BB比原訂預產期size 大咗少少, 預產期提早至9/3。今次算過咗第一關~

預約23/9 3:00pm 返贊育做第一次產檢見醫生...結果12:45才離開。

反應不一

上次懷孕全無反應照食照瞓，但今次7w開始個胃就好漲，有反胃感覺，但沒有嘔吐，不喜歡食豬肉，食蔬菜較易入口。雖然沒胃口，但午飯後兩三小時就肚餓，怕肥不想吃亦不可以，肚空又有叫聲。每日放工就十級疲倦，未到10:30已經想上床瞓...今次比上次辛苦得多~

上次懷孕後期有高血壓出現，今次要特別注意飲食，午餐盡量帶住家飯，避免食太咸太油。今次跟上次一樣每日一蛋加一樽裝鮮奶，希望BB吸收日日長大 ^^

星期六睇第二次潘醫生，BB size 正常跟預產期吻合，10w2d已經見到有手有腳啦!! (好似唔記得哂咁~)

第二次奇妙旅程開始

心急人同勞先生不是獨生子女，更希望下一代有兄弟姊妹。生完勞小姐後，一直有諗生多一個小朋友，因為想勞小姐有個伴一起成長，學懂同人分享。上年12月由BKK返來後開始"龍馬精神"計劃。

如果要多一個小朋友，兩姊弟/姊妹年齡相差唔想太遠，兩年就差不多，加上心急人年紀唔細，要追趕時間。今次心態真係輕鬆得多，沒有太計算日子、沒有用紅D綠D、沒有去睇中醫調理身體，結果6 cycle 後成功了。

LMP 4/6/2014, 1/7/2014 未見M小姐來...到12/7 的起心肝去買支棒棒驗，真的Bingo 了(其實唔驗都知^^)。第二胎就係咁，冇咁緊張。早在9/7己經book 咗潘醫生19/7照閃閃到時已經6w4d~

今日都預約了贊育，26/8第一次產檢，希望順順利利啦~

新玩具

最近加入facebook 有關airfryer嘅group，在group內發現有好多新食譜，原本已打入冷宮，又可以拎返出嚟嘞~

今日仲買多件配件可以炸魚 ^^

自制臘腸

心急人鍾意食臘腸，市面的有太多添加劑，有些太肥，有些太甜。早前見團購有臘腸班就立即叫表嫂一齊報名。

噚日一早起身同媽咪食完早餐就去葵興，葵興對心急人來說是很遠、很陌生的地方，11點開始，我倆10：15到了。

原來臘腸好容易製作，最麻煩步驟是風乾。

堂上介紹用風乾機，心急人第一次整唔想又買一部機，部機都幾大部架~

返到屋企用焗爐以60度烘乾，乾10小時

再自然風乾一日，放冰櫃保存。

堂上教用幼身羊腸衣，個人覺得太幼身欠口感，稍後心急人會創造個人口味的臘腸^^

第一堂play group

原本心急人不打算讓勞小姐上play group，她每日都會跟婆婆出街，接觸人多，不怕陌生人。但身邊同事常說上play group 可以了解小朋友多點，有問題及早發現。。。

到她一歲時才上網求其搵下有冇合理價錢、地點方便嘅play group, 好彩又搵到有間社區中心有位，價錢0K $1080／8堂，不用坐車行路就可以。

今日勞小姐踏入16個月，亦開始上第一堂play group。每次只可以一位家長陪同上堂，今次由勞力士操刀，基本上導師的指示由家長完成，勞先生話好似佢上play group咁~

勞小姐瞓醒食飽奶特別醒神^^

16個月大可以上初班，慢慢升上至學前班。班上最大嘅小朋友是21個月大，勞小姐算最細。一開始玩玩具，到齊人就開始唱歌，拍下手，分顔色波、認眼耳口鼻、用glue貼下嘢咁啦，話咁快就一個鐘。勞小姐都好合作冇扭計，但好八卦掛住望其他小朋，又想行埋去人地度，真正八卦妹。

上完堂就行去新都城玩具反斗城行街街

到勞小姐開餐時間，要搵D唔洗俾人趕走嘅地方，今次試新店spaghetti 360，都幾好味，下次可以再幫襯^^

工展會大出血

一早同daddy 媽咪飲茶，勞力士要照顧未退燒嘅勞小姐，唯有兩個齊齊留屋企。

之前表嫂話工展會內售價比外面還要貴，媽咪都話唔去。今日放假而工展會又差唔多關閉就同媽咪行下，一人一架手推車入場，結果滿載而歸^^

嘉頓明顯比開始時減咗價；猴棗末售價應該同BB展一樣加送保嬰丹；馬油比sogo平；安記五頭鮑買3盒送多2隻；亞麻籽$50 3包，行一個圈唔見5、6千~

行完就去華姐食牛腩麵，呢間出名麵舖店員唔會黑口黑面，仲會幫忙存放手推手，次次光顧去都好滿意。