柚子戚風蛋糕

睇過好多blog，個個都話戚風蛋糕好味，心急人未有焗爐已經好想整戚風蛋糕呢! 焗爐準備好，到戚風蛋糕模嘞，心急人睇過超過十個整蛋糕高手嘅blog，大家推介嘅戚風蛋糕模係KAI (17cm)售價為HK$253，好貴呀!!!!

(心急人經過一個月時間考慮，終於買咗嘞!)

因為一直無時間去灣仔買材料，結果去咗Sogo買日清麵粉＆柚子茶，下個星期一定去灣仔入貨~

今日心急人終於試整柚子戚風蛋糕，但.....

......哎......哎......哎

1. 把雞蛋分蛋黃同蛋白十分有難度，媽咪已經買咗個分蛋器，亦未能成功，結果浪費了一只蛋

2. 蛋白打過龍，結果個蛋糕濕咗d

3. 最大件事......心急人花咗一個月時間考慮，仲會袋埋把呎出街度個蛋糕模，驚過高入唔到爐（心急人個爐比較細），度好確定無問題先買.....結果到心急人把蛋糕模入爐時，才發覺蛋糕模高咗dd入唔到爐......點解會咁架!!!!!!明明係無問題ga嘛......心急人不理後果，將焗爐隔攞走，把焗盤直接放在發熱管上，再放蛋糕模......好彩最後順利入爐，但心急人個心停咗幾秒

4. 入爐後約十分鐘，戚風已經不斷升呀...升呀...升呀，到頂了......結果黑哂......不過濃的一面係蛋糕底，切咗黑色部份都可以見人

雖然第一次整遇到好多問題，但心急人會繼續整，因為真係好好味呀！

戚風蛋糕十分軟綿綿喔!!

材料(綜合咗N個食譜)：

a. 蛋黃 - 2只; 砂糖 - 20g

b. 柚子蜜 - 50g; 熱水 - 40g

c. 菜油 - 40ml

d. 低筋麵粉 - 70g

e. 蛋白 - 4只; 砂糖 - 50g; 鹽少許

準備:

1. 將柚子蜜與熱水拌勻

2. 將麵粉過篩2次

3. 焗爐預熱170度

做法:

1. 將(a)打勻至淡黃色

2. 加入柚子蜜汁及菜油拌勻

3. 用另一個盆把蛋白加鹽少許打至起泡，將糖分三次加入發打，直至蛋白豎起後有立角硬度為止

4. 1/3蛋白─>1/2麵粉─>1/3蛋白─>1/2麵粉─>1/3蛋白以fold in形式放入蛋漿混合

5. 麵糊倒入模，用刮刀整平雙手提起模在桌上輕敲，以消除麵糊空隙

6. 以170度焗30分鐘，出爐後倒扣，脫模即成

 

唔想浪費雞蛋，整咗冰糖蛋花大菜糕，將整蛋糕用剩嘅蛋加哂入去 (1只未能成功分到蛋黃蛋白的全蛋及2隻蛋黃，太多蛋啦!!)

大菜 - 10g

水 - 650 ml

冰糖 - 80g

雞蛋 - 1只 (今次特別多)